Текст Жития Андрея Боголюбского издается с соблюдением современных правил пунктуации и с заменой всех устаревших букв на современные[1] РГИА. Ф. 834 (Собр. Синода). Оп. 2. Д. 1788. Л. 61
об. – 81. Большую помощь в подготовке текста Жития
к изданию оказала Т.П. Тимофеева, за что приношу ей
искреннюю благодарность.
\\\\\\\—–источник
Бяше сей благоверный и благородный Богом предъизбранный и хвалам достойный великий князь Андрей Георгиевичь Боголюбский самодержец всея России сын великаго князя Георгия Владимировича Долгорукаго, от святаго корене святопомазанная отрасль, яко бысть шестый степень от самодержавнаго и равноапостольнаго царя и великаго князя Владимира Святославича, просветившаго Российскую землю святым крещением. От добродетелей же (князь Анъдрей) многу и преславну приобрете похвалу не токмо от человек, но и от самого Бога; от юного бо возраста и от младых ногтей Христа возлюбив, от мирских суемудрий отврати себе, душетленных же и богоненавистных игр и бесовских сонмищ до конца возгнушався: ни на что бо ему бе тщание от сущих мира, точию и поучением книжным и к церковному пению. Гласы божественными всегда оглашаше ушеса своя, святых книг поучений сладце послушающи, отнюду же притяжа себе зачало премудрости: страх Божий и премудрость разума писаний святых. Всегдашния же бе у него бдения всенощная и утаенных молитв к Богу присвоение; многой же пищи и сладких яств и любоплотия до конца отвратися, сим всем телу своему немилостив враг бысть; чистотою украшен, милостынею к нищим богат: бяше бо великий сей самодержец и первый основатель Великаго Владимирскаго княжения отец сирым, вдовам питатель, обидимым заступник, в скорбех сущим благий утешитель; бяше же измлада тих и кроток зело, и боголюбив яко всем зрящим дивитися; и сего ради Бог бяше с ним неотступно. Сице же ему преспевающю во благих, и день и нощь поучаяся божественным, от всех тщашеся утаити своя исправления, да ведоми будут единому Богу, ведящему когождо утаенная. Но елико он тщашеся утаити, толико Бог яве всем проявляше преславная его деяния: обычно бо Богу проявляти святых своих и прославляти нетленною славою и не хотящим им. Глаголет бо: «Славящия Мя прославлю». И на другом месте речется: никто же вжигает светильника и поставляет его под спудом, но на свещник возносят горе, да светит всем, иже в храмине суть, да и входящии свет узрят. Яко же убо невозможно превелику граду, на высоцей горе стоящу, утаену быть и от всех невидиму: аще убо непщую, неудобно и благознаменитому сему и всехвальному мужу не ведому быти на общую всем, яже от пресветлаго того жития пользу.
Сей святый великий князь Андрей, яко от утренния зари светозарное солнце, на небесную высоту деяний божественных пресветло возшед, и яко крин цветяше в добропребываниих день и нощь, преспевая в законе Господни. Пребывающу же ему тако во благочестии и вере, яже к Богу и житием правым присноцветущу, родитель его великий князь Георгий Владимировичь поиде из Вышеграда и седе на Великом княжении в преименитом граде Киеве, на свое же место посади в Вышеграде сына своего сего боголюбиваго князя Андрея. Якоже убо прорастишася святая розга от царских чресл, предпочтен бысть и предъизбран от Бога честию. Вкупе же и видом благородия и телесным благолепием вельми украшен, паче всех сродник своих: благородием бо и благолепием лица предзыде их яко солнце всех светил: храбростию же и силою в воинстве и смыслом благоразумия и премудростию Божественных писаний зело восхвален. Тако его Бог почте и украси прежде будущих в житии сем, яко верна своего угодника! И сего ради яко верный раб благоуготови себе во благих угодити Господеви своему сотворити волю Его, по реченному: яко ему же дано много и взыщут от него. И паки: яко сильнии, сильно истязани будут в день испытания. И сего ради во мнозех трудех упражняшеся и собою образ подаваше всем; милостынею же к нищим и почитанием монашествующих прехвален бе зело.
В некое время сей великий князь помысли господствовати во граде Ростове, да и тамо сущих святым своим житием на путь истинный наставит. Беседующу же ему и разглагольствующу о святых иконах с боляры своими, от них же един, премудростию же превосходя прочих, поведа ему о образе чудотворном Пресвятыя Богородицы сице: по Воснесении Господа Бога и Спаса нашего Иисуса Христа на небеса богогласный Евангелия Христова списатель богомудрый апостол и евангелист Лука при жизни еще Пресвятыя Владычицы нашея Богородицы и Приснодевы Марии яко истинный самовидец и неложный описатель образ Ея живописа, святое лице Ея мало окружено вообрази, ни кругло ни остро, но мало продолжено, нос не краток, но продолженый, доброгладостне лежащ, на десней стране близ лица Ея написа Превечнаго Младенца Господа нашего Иисуса Христа; персты же богоприемных Ея рук тонкостию продолговаты написа, и преукрашенно пречестную и святую икону совершив, к самой Богоматери благоговейно принесе. Она же милостивне богозрачнии Свои очи на образ той возведши, пречистыма Своима глаголаше усты: «С сим образом благодать Моя и сила да будет»[2]О сем говорится в Ч[етьих] Мин[еях], см[отри] под чис[лом]
18 окт[ября] (Прим. иером. Иоасафа)., и с сим образом с вами есмь. И от того времени той святый образ в палестинских местах многая лета пребываше и исцеления всем неоскудно подаваше. По некоем же времени та святая и чудотворная икона пребысть во граде Лидде. Преблаженнейший же и святейший Герман патриарх Цареградский с того чудотворнаго образа подобие списати повеле и иконоборства ради от царя Льва Исаврянина той самый святый и чудотворный образ пусти на море в Рим. И тако та святая и чудотворная икона морем прииде в Рим единым провидением[3]В рукописи «ноизденством». Исправлено по смыслу.. По летех стотридесятых паки той святый и чудотворный Пресвятыя Богородицы образ изыде из римския церкве и прииде морем в царствующий град Константинополь при благочестивом греческом царе Михаиле и матери его царице Феодоре в лета же русскаго великаго князя Рюрика. Послежде теми же неизследимыми судьбами Своими человеколюбец Господь Бог наш благоволил новопросвещенную Русскую землю, пренепорочныя Матере Своея чудесоточащим образом наследити сице: по претечении от создания мира шести тысящ шестисот пятидесяти лет, при державе благовернаго великаго князя Георгия Владимировича Мономаша-Долгорукаго в Вышеграде, родителя же сего святаго славнаго и великаго князя Андрея Георгиевича Боголюбскаго, принесен бысть той святый и чудотворный образ из Царяграда в царственный богоспасаемый славный и великий град Киев некоторым христолюбивым мужем чина купеческаго, Пирогощею зовомым, и поставлен бысть в Киевской державе в Вышеграде в девичье монастыре. И тамо той святый и чудотворный образ в том монастыре некая лета пребываше, и презъестественная чудеса содеваше и исцеления безчисленная подаваше всем с верою приходящим; от них же зде некая да рекутся. В некое время клирицы обители тоя, входяще в церковь, видеша той богородичный чудотворный образ сошед с места своего и стоящ посреде церкве на воздусе; клирицы же тии дерзнуша яко поставити на ином месте, но и паки видеша второе той святый и чудотворный образ стоящ о себе посреде церкве и обратившийся лицем своим во святый олтарь. И помысливше онии клирицы в себе, друг ко другу рекоша, яко хощет той святый и чудотворный Пресвятыя Богородицы образ во святом олтаре стояти. И вземше его, несоша во святый олтарь, и поставиша за святою трапезою; но и третицею видеша той же чудотворный образ стоящ о себе вне святыя трапезы. Сии же клирицы тии видяще, недоумевахуся и ужасахуся: не видяху бо где Сама Богоматерь изволит Своему образу жилище избрати.
Сия вся слышав святый и великий князь Андрей; мысль же в себе имея, еже господствовати во граде Ростове, надеяся же на милостивыя щедроты Богоматерни, яко и тамо Владычице Пресвятая образом Своим святым чудодействовати имать, и разгореся сердечною любовию, тече скоро в девичь монастырь, и вниде во святую церковь. Помолися умиленне, и нача по святым иконам взирати с благоговением. И абие узре той святый и чудотворный Пресвятыя Богоматере образ, светящся зраком божественнаго подобия паче инех икон, стоящих в церкви; и страхом великим одержим, пад на землю пред тем чудотворным богоматерним образом, и моляшеся на долг час со слезами, сице глаголя:
«О Пречистая Госпоже Дево Богородице, Мати Христа Бога нашего, аще хощеши можеши помощница ми быти и в Ростовстей земли, идеже тщимся шествовати. И тамо посети нас, Владычице, новопросвещенныя люди; и яко же сама веси, снабди и спаси достояние Сына Твоего и Бога нашего, и Твое, яко вся Тебе возможна; приклони, Пречистая, ухо твое к молению нашему и простри руце Твои на мольбу к Сыну Своему, Христу Богу нашему, и сохрани стадо Твое, и заступи от всякаго зла, и не отрини нас от Своего честнаго образа, Владычице! Тя бо имеем молебницу теплу и стену тверду и покров нерушим земли нашей, яко да на Божественный Твой образ взирающе, сердцем радуемся и душею веселимся, имуще Тя державу непобедиму и утверждение непоколебимо, и надежду и спасение душам нашим».
И по молитве востав, приступи к образу Пресвятыя Богородицы, простре руце свои, прикоснуся тому чудотворному Пресвятыя Богородицы образу. Взем же с места и понесе из церкви яко некое безценное сокровище. Не возвести же сего отцу своему великому князю Георгию Владимировичу, в Киеве ему пребывающу, и изыде нощию из Вышеграда со княгинею своею и с чады, с боляры и со многими людьми; взем же с собою из Вышеграда иерея Николая и зятя его диакона Нестора с женами их; и тако идяху, путем молебная совершающе. И яко приидоша к реце, Яузе нарицаемей, ей же зело наводнившейся, посла великий князь Андрей человека на коне в реку испытати воду, и той человек утопе в реце, и невидим бысть. Благосердый же великий князь Андрей пад пред чудотворным Пресвятыя Богородицы образом, моляся со слезами умиленне и себе повинна творя утоплению человека. И по молитве (о дивное чудо!) изыде человек той из реки на коне ничем же вредим, жезл в руце своей держа. Потом приидоша на Рогожския поля, и вышереченнаго иерея Николая жена сниде с колесницы; конь же в колеснице возсвирепевся, сверже с себе иереева раба, и изломи ему ногу, жену же иерееву ногами топташе и зубы грызяше и влачаше ю по земли, дондеже сотвори ю аки мертву. Пресвитер же от горести сердечныя тече и возвести сие великому князю. И приидоша к образу Пресвятыя Богородицы, начаша со слезами молитися, падше оба на землю, и в том часе здравы быша жена иереева и раб, и никаковаго же вреда от того биения обретеся на них.
По изшествии великаго князя Андрея из Вышеграда родитель его благоверный князь Георгий Владимировичь, в сие же лето преставися ко Господу и положен в Киеве[4]По летописи вел[икий] кн[язь] Георгий Владимировичь
скончался 1157 г. мая 15 д[ня]. Собр[ание] рус[ских]
лет[описей]. [Т.] I, [С.] 149. (Прим. иером. Иоасафа)., остави же все самодержавие Российское сыну своему сему великому князю Андрею.
Идый же великий князь Андрей предприятым своим путем и быв во Владимире, идеже с велию честию сретоша его с чудотворным Пресвятыя Богородицы образом вси граждане от мала до велика. И поиде из Владимира к Ростову, и достиже вниз по реце по Клязьме того места, идеже ныне стоит Боголюбов монастырь[5]В 9-ти верстах от Владимира. (Прим. иером. Иоасафа)., и на том месте бывши, под тем чудотворным Пресвятыя Богородицы образом, кони сташа и нимало с места поступиша. Великий же князь нача о том вельми удивлятися и ужасатися; и повеле иныя кони сильнейшия привести на пременение первых коней; и быша по обычаю впряжены под то же возило[6]Здесь возило, а в Степ[енной] кн[иге] сказано: «и чудную
икону на сани поставляху» [Т.] 1. [С.] 298. (Прим.
иером. Иоасафа)., на нем же чудотворный Пресвятыя Богородицы образ стояше. Но и тии кони такожде понуждаеми и биени бывше, никако же с места того поступити могоша. Сие чудо великий князь Андрей видя, яко кони не могут со образом двигнутися с места того, ужасом велиим одержим бе, чудяся необычному действу, и повеле иных коней множество привести и впрящи, обаче и по сих ничтоже успе. И нача вельми плакати и тужити, помышляя, яко за некое его прегрешение не хощет Пресвятая Богородица образа Своего в Ростове поставити; обаче страх весь отложив и отчаяние отринув, разуме сие преестественному чуду быти; того ради всю свою надежду на Господа Бога и на Пречистую Его Матерь возложив и ревностию разжегся, повеле иерею (Николаю) на том месте пред чудотворным Пресвятыя Богородицы образом молебное пение совершити; во время же то и сам пред образом Пресвятыя Богородицы паде на землю и со слезами нача молитися, обещаваяся на оном месте церковь каменную поставити и украсити ю елико мощно. По молебном же пении великий князь Андрей вниде в намет свой и пад на землю, нача со слезами пред святыми иконами молитися, понеже сей благочестивый князь всегда с собою в пути святыя иконы при себе имеяше: первую Господа Бога Вседержителя, вторую – Пресвятыя Богородицы, третию – Иоанна Крестителя и две святых первоангел – Михаила и Гавриила, и в намете своем чинно поставляше; и молящуся ему со слезами умиленне на долг час в нощи, в полунощи Сама Пресвятая Богородица, теплая о всем мире предстательница, явися очевидне в намете его, стоящая, держащи в единой руце хартию, и рече ему:
«Не хощу, да образ Мой несеши в Ростов, но постави его в граде Владимире; а на сем месте во имя Моего Рожества храм созижди и обиталище иноком сотвори».
И воздвигши свои руце ко образу Владычню, молящеся, такожде очевидне явльшемуся Христу Богу, благословляющему и любезно внимающему Ее молитвам. И по сем бысть невидима.
Что же творит богоподражательныя кротости образ, в царстводержателех достойно почитаемый скипетродержец великий князь Андрей? От всего добродетельнаго своего сердца и боголюбезныя души весь распалився огнепламенною радостию, и неизреченнаго исполнен быв веселия, пад на землю, Всевышнему Богу и пренепорочной Его Богоматере прерадостне усерднейшее и раболепное приношаше благодарение, недостойна себе творя толь великаго, толь преславнаго, толь досточуднаго, Божия Матере светлосияющаго неизреченною славою явления. И скоро повеле на том месте, идеже сподобися видети Небесную царицу и скорбящих всех прескорую утешительницу, во имя Ея, от чистожительствующих святопочитаемых родителей, преславнейшаго, ангелом благовествуемаго, от неплодове пречудодействуемаго Рожества, церковь каменную заложити. И тако дело, предстательством чистыя Приснодевы, начало течения своего скоропоспешнее прия. Не едино же сие, но и другое, не терпяще бо долгаго времени, но пламенновидною любовию воспламененный, боговидное досточудных добродетелей зерцало, Божия Матере всеусерднейший любитель, великий князь Андрей, призва искуснейших изографов и повеле образ Пресвятыя Богородицы таковым подобием, якоже ему явися, благолепне написати. Изографи же написаша образ со многим благоговеинством, постом и молитвою и кроплением от святыя воды, якоже повеле им великий князь, и принесоша к нему. Он же, видев той образ, повеле иереови освятити; и пад пред святым образом Богоматери на землю, моляся со слезами, благодарствующи Бога и скорую помощницу и заступницу нашу Владычицу, всем сказующи, яко таковым точне подобием сподобися видети явльшуюся ему Царицу Небесную. И за помощию таковыя ходатаицы Пресвятыя Богородицы и церковь каменную на показанном Богоматерию месте соверши, яже и ныне молитвою Ея неподвижне пребывает, в ней же новописанный в подобие явльшияся ему Богоматерию образ, нареченный Боголюбивым, постави и освяти оную церковь; устави же того чуда праздник праздновати по вся лета месяца иуниа в 18 день, на память святаго мученика Леонтия. И сего ради преславнаго и чудеснаго Божия Матере явления великий князь Андрей нарече место то Боголюбимое; оттоле же и сам прозвася Боголюбский. Потом же ту град построив и двор свой княжий близ новосозданныя Рожества Пресвятыя Богородицы церкве постави, и вельми место оно любляше, и живяше ту.
Во второе по пришествии своем лето великий князь Андрей на новосозданной Рожества Пресвятыя Богородицы церкви, яже об едином версе соделана бяше, главу по дугам и крест окрывши жестию, позлати, верх же ея весь немецким железом покры и пришедшим из других земель изографом оную церковь внутрь стенным иконописанием лепотне украсити повеле. При оной же Рожества Пресвятыя Богородицы церкви вторую церковь во имя святаго мученика Леонтия созда и монашествующих собра, поставив им первоначальника игумена Сергия зовома, не престая же о украшении стенном первыя церкве пещися, но вельми о том подвизашеся и всякими драгими вещами оную церковь украшаше и обогащаше. Потом при оной Боголюбимой обители святыя врата каменныя содела, и на них церковь во имя тезоименитаго себе святаго апостола Андрея Первозваннаго устрои и освяти ю. Во оное же лето вышереченнии изографи в церкви Рожества Пресвятыя Богородицы стенное иконописание совершиша, чего ради великий князь Андрей радости велия исполнися, праздник пресветлый сотвори, благодаря всевышнего Бога и Пречистую Его Богоматерь, в том ему помогающую. И удоволи священный чин, монашествующих, такожде и прочих православных христиан обоего пола к тому торжеству собравшихся, и нищих всех накорми до избытка. Церкви же и обители много имения вда и села своя лучшая с даньми.
По сем великий князь Андрей первое (в первый раз) поиде со всею своею воинскою силою на безжбожныя и противящияся ему болгары, их же помощию Божиею и предстательством Пресвятыя Богородицы без кровопролития христианскаго победи, идеже множество белаго камене обрете, и реками Камою, Волгою, Окою и Клязьмою во Владимир привезе. По торжественней же сей на болгары победе, во благодарение Божией Матери, повеле во граде Ростове во имя Ея церковь каменную создати. Егда же начаша рвы копати, обретоша мощи святаго Леонтия епископа Ростовскаго нетленны. И послаша весть к великому князю Андрею, сущу ему во Владимире. Великий же князь, истинный любитель и почитатель Божиих угодников, слышав сия, возрадовася радостию велию и прослави милость Божию, яко во области державы его сицево сокровище открыся. И посла гроб каменный, в нем же повеле положити мощи святаго.
В лето шесть тысячь шестьсот седмидесятое великий князь Андрей близ Боголюбовския обители яко поприще едино, на реке Клязьме в лугу нача здати церковь во имя Пресвятыя Богородицы честнаго Ея Покрова, на устье реки Нерли, из собираемых и дволетием из Болгар возомых камней для строения во Владимире соборныя Успения Пресвятыя Богородицы церкве и других, десятыя части, яже по повелению его на том месте отлагаемы бываху. И помощию Пресвятыя Богоматере оную церковь единым летом соверши и обитель монашествующим при ней содела.
В приидущее же лето во граде Владимире вместо соборныя Успения Пресвятыя Богородицы церкве древянныя дубовыя (юже святый великий князь Владимир, во святом крещении нареченный Василий, созда) восхоте каменну создати. И тако повеле под основание рвы копати и бут бутити; место же размери: от предних дверей до горняго места седмнадесят сажен, поперег церкви дванадесят сажен и два с половиною аршина; в церкви же двери пятеры повеле заложити. И тако за помощию Богоматере рвы набутиша.
Пребывающу же великому князю Андрею с Мануилом царем греческим в мире и любви, прилучися им во един день изыти на брань: царь Мануил на срацины, а великий князь на болгары, взем с собою животворящий крест Христов и чудотворную икону Пресвятыя Богородицы (принесенную им из Вышгорода), юже всегда обычай имяше взимати в помощницу на противныя, Ея же молитвами и заступлением побеждени быша болгары: четыре убо грады их разориша и плениша, и стольный их град Бряхимов, иже на реке Каме стояше, взяша; русское же воинство поможением Пресвятыя Владычицы ничим же вреждено бысть; от иконы бо Господа нашего Иисуса Христа, и Пречистыя Его Матере видеша вси лучи огненныя исходящия, ими же все воинство покрывахуся, и уразумеша помощь Божию быти. Возвращшеся же воини от сечи, и прочие грады болгарские попалиша и дань на болгар возложиша. Царь же Мануил в то время в своих полках сие же видение виде и одержа победу над срацынами; и общим советом в память сего события с великим князем Андреем уставиша праздник праздновати Всемилостивому Спасу августа месяца в первый день.
По богодарованной над злобствующими болгары победы, и от чудеснаго от образа Пресвятыя Богородицы озарения, великий князь Андрей более нача прилежати к совершению Богоматерня храма, при котором созидании всегда сам присутствоваше, и поможением Пресвятыя Богородицы соверши о едином версе, и позлати его; чесо ради оная святая церковь от того времени Златоверхая прозвася. Чудесоточный же Пресвятыя Богородицы образ, его же принесе с собою из Вышеграда, пренесе из Боголюбова во Владимир и постави в сей новосозданной Успения Пресвятыя Богородицы соборной церкви; и собрав множество священнаго чина, оную церковь освяти, и многое празднование соверши, всяцем бо изобилием удоволи священный чин и нищия от многих стран собравшияся. И оттоле оный святый чудотворный образ Пресвятыя Богородицы нача зватися Владимирский; и обложи его златом с камением многоценным и драгим жемчугом; возложи же на нь злата более тридесяти гривен. К той же соборной Успения Пресвятыя Богородицы церкве много имения вда: город Гороховец и свободы купленыя з даньми, и села своя лучшая, и десятое в стадех своих, и торг десятый.
По совершении же Богоматерня храма и духовном веселии великий князь Андрей большею ревностию к строению святых церквей разжеся, и помысли, чтоб в великом земляном городе среди осыпей, во утверждение всего града, врата Златыя (по подобию Киевских) устроити и на них церковь Положения ризы Пресвятыя Богородицы создати, и повеле рвы копати, бут бутити и камение тесати, еже и содеваху делатели со всяким усердным прилежанием. Заложенныя в прошедшем лете Златыя врата и на них церковь совершишася; ради же видения красоты их вскоре леса подмостныя сбраша, еще извести мокрой сущей, и ту ко вратом града народу многу сшедшуся зрети красоты их, инии же и во врата внидоша, и в то время свод врат паде, в них же дванадесят человек камением засыпа. Великий же князь Андрей, услышав сие, припаде со слезами к чудотворному Пресвятыя Богородицы образу, повинна себе творя пагубе людстей. И по молитве, егда разобраша камение, всех оных дванадесят человек, их же камение засыпа, живых обретоша и ничимже врежденных милостию Пресвятыя Богородицы и молитвами великаго князя Андрея. В приидущее же лето оныя падшия Златыя врата паки созда и церковь на них освяти, и иерея к ней с причетники определи, и милостынею довольною их снабди.
В лето шесть тысячь шестьсот семдесят второе сын великаго князя Андрея Изяслав ко Господу отъиде, и положен бысть в соборной Успения Пресвятыя Богородицы церкве.
В лето шесть тысячь шестьсот семдесят седмое великий князь Андрей посла сына своего Мстислава в Киев изгнати за неправду и непокорение князя Киевскаго Мстислава Изяславича с престола его, и посадити брата своего Глеба Юрьевича. Он же, яко благопослушливый сын, шед в Киев, и реченнаго киевскаго князя Мстислава Изяславича изгна, и вместо его посади на княжение Киевское дядю своего Глеба Юрьевича.
В лето шесть тысячь шестьсот осьмдесят первое сын великаго князя Андрея Мстислав ко Господу отъиде, и положен в новосозданной златоверхой Успения Пресвятыя Богородицы церкве. Великий же князь для утоления печали о сыновней кончине, поиде в любимый свой град и обитель Боголюбскую, и тамо около своего великокняжеского двора во делании того места упражнявшеся. Таже поиде во град Суздаль, да и тамо церкви Божия возобновит, обветшали бо беша. Пребывающу же ему тамо, и святыя церкви, такожде и град (Суздаль) усердне обновляющу, меньший его (вел[икаго] князя) и любимый сын Глеб, двадесятолетен сый, ко Господу отъиде. Егда же уведа кончину любимейшаго своего сына, вельми опечалися. И поиде из Суждаля во Владимир, и с великою горестию и слезами мощи сына своего положил в церкви Успения Пресвятыя Богородицы Златоверхой. Последи же прослави его (Глеба) Бог нетлением телеси и чудотворением, якоже ныне видим; приходящим бо с верою к честным мощам его, источаются чудеса.
Великий князь Андрей, одержимый печалию о кончине любимейшаго им сына, для утоления оной поиде в любимый свой град и обитель Боголюбскую, и пребываше тамо всегда при образе Пресвятыя Богородицы, идеже явися ему Сама Владычица; взираше же на Ея святый образ, и утешшеся от печали, поминая очевидное Пресвятыя Богородицы посещение; и яко на самую Ея взирая и велию отраду от скорби обретая, не отхождаше от церкве, но постом и молитвою укреплен, пребываше при образе том, выну моляся во дни и в нощи.
Бяху у сего великаго князя Андрея ближнии его и любимии бояре, зовомии Кучковичи, злии советницы диаволи; сии прежде своим советом лукавым увещаше великаго князя без отчаго повеления взяти из Вышеграда чудотворный Пресвятыя Богородицы образ, иже написа евангелист Лука; сии окаяннии Кучковичи надеющиися на милости к себе великаго князя, неподобная содеваху. В них же бяше един, зовомый Иоаким Кучковичь, его же брат присный некия ради вины ят бысть и по градскому закону казнь восприя. Сия слыша безумный Иоаким, и абие вселися в него сатана, якоже древле во Иуду искариотскаго, и тече ко братии и сродником своим, злым советником сатанинским, и, вопия, к ним глаголя:
«Се днесь великий князь предал есть казни онаго брата нашего, а заутра такожде и нас казнити имать; да промыслим вскоре месть князю нашему!»
И тако окаяннии совет сотвориша и уготовашеся на убиение великаго князя. Бяше же таковому убийству первейшии злоначальницы: Иоаким Кучковичь да зять его Петр, Анбал ключник Ясиня и Ефрем Моузовитин, всех же окаянных убийц числом бяше двадесят человек.
Великому убо князю в Боголюбове бывшу, в своем великокняжеском доме, и в полатых своих (яже приделаны быша к церкви Рожества Пресвятыя Богородицы, идеже и ныне видими суть), от молитвеннаго своего труда почивающу, окаяннии убийцы дождавшися нощи, собравшася, и вземше кийждо оружие свое, пришедше ко двору великокняжескому, бывших у врат и во дворе стоящих у сеней стражей побиша, и двери выломавше, приидоша к ложнице, идеже великий князь бяше со единым точию малым отроком, и спаше. Окаяннии же убийцы у ложницы великаго князя при дверех лестию вопияху:
«Господине, господине великий княже!»
Князь же великий, услышав, рече:
«Ты кто еси?»
Убийца же рече:
«Прокопий».
Слышавше же окаяннии глас великаго князя, начаша сильно бити в двери, и отбивше их, выломиша. Великий же князь скочи с постели своея, и хотя взяти мечь, иже бе у него в ложнице, сродника его, великаго князя и страстотерпца Христова Бориса, и не обрете того меча, понеже мечь той из ложницы вынесе тайно ключник его Анбал. Два же окаяннии убийцы вскочиша в ложницу и яша великаго князя; он же единаго их поверже себе под ноги, а с другим нача братися крепко. Потом и прочии убийцы вскочиша в ложницу и, мневше великаго князя повержена на земли лежаща, и убиша подруга своего; и познавше же великаго князя, бияхуся с ним: бе бо великий князь силен вельми; и многими мечми изсекоша и сулицами пронзоша его. Мняще же мертва быти, оставиша его тако, вземше подруга своего, его же убиша под великим князем, и понесоша его вон. Великий же князь от болезни ран вскочи и потече за ними вслед из ложницы своея; не мочи же от толиких ран далее тещи, уклонися под сени за лествицу и стеняше; они же послышавше стенание его, вспять возвратишася, имуще убити его, глаголюще друг ко другу:
«Погибохом мы, яко великий князь жив есть».
И вжегше свещи, поидоша по следу крови и обретоша его за столпом восходным (сиречь лестницею) на земли седяща, со стенанием воздыхающа и молитву творяща сице:
«Благодарю Тя, Господи Боже мой, яко тако днесь смирил еси душу мою, и таковым убивством кончину животу моему приемлю от домочадных ми. Молю ти ся, милосерде, слез моих не премолчи, презри беззакония моя и грехи моя вся очисти и душу мою помилуй! Аще и много согреших, но от Тебе не отступих. Аще и заповеди Твоя не сохраних, но вем, яко милостив еси. Виждь, Владыко, яко любимии мною воздаша ми злая за благая и кровь мою пролияша! Аз же вся сия терплю и на Тя, Господи, уповаю, да вместо земных, не лишиши мене Небеснаго Царствия Твоего, и причтеши мя лику святых Твоих мученик. Аминь».
Окаянный же убийца Кучковых зять Петр отсече ему десную руку, прочии же убийцы мечи збодоша его. И тако святый благоверный великий князь Андрей Боголюбский, истинный хранитель заповедей Господних, преизрядный и доброревностный строитель святых церквей, благоверия любезный рачитель, злочестия же тщаливый искоренитель, правды вседушный любитель, мужества прекрепкий оружник, любвебогатый стяжатель, милосердия обильный раздаятель, любомудрия прилежный снискатель, целомудрия твердый содержатель, чистейшую свою и святую душу предаде в руце Божии в лето 6683 месяца иуниа против двадесятдевятаго дня, в нощи, на память святых и первоверховных апостол Петра и Павла. Во утрий же день боголюбстии клирицы сего благовернаго и великаго князя Андрея Георгиевича обретоша под сеньми за восходным столпом, всего уязвенна и в крови лежаща на земли мертва и, вземше честное и святое тело его, внесоша в церковь Рожества Пресвятыя Богородицы, юже сам созда, и положиша его во гроб каменный.
Во граде же Владимире о убиении великаго князя Андрея владимирстии клирицы и вси людие уведавше, собрашася множество народа многое, мужие же и жены, и яко же начальственнейшии клирицы соборныя великия церкве, тако и вси, и весь народ потекоша спешно и пришедше в малый град Боголюбов, и видевше своего господина и добраго пастыря во гробе лежаща мертва, воздвигоша гласы своя и многия слезы изливающе, глаголаша:
«Увы нам, милостивейший наш господине, пастырю и хранителю наш дражайший! Кому нас, сирых, оставил еси? Кто нас, печальных, утешит? Кто наши недостатки исполнит? Кто о нас, убогих, попечется? Увы нашего несчастия! Увы последняго нашего злополучия!»
И тако вси плакавше довольно, тамо пребыша шесть дней, да вси приходящии насладятся прикосновением и лобзанием святых мощей его. В седмый же день вземше честное и святое тело его, со псалмы и песньми, с кандилы и многими возженными свещами, понесоша на главах своих во град Владимир. И яко в Боголюбове, тако на пути и во Владимире, от мощей его святых многая чудеса и исцеления быша: слепии прозираху, хромии хождаху, и мнози различными недуги одержими, исцеления получаху. Принесше же, положиша святыя мощи его в соборной великой церкви Успения Пресвятыя Богородицы Златоверхой, яже бе им самим создана, в приделе Благовещения Пресвятыя Богородицы, иже и доднесь всеми приходящими видимы суть, и подают с верою молящимся разных болезней и недугов исцеления. И тако славяще Бога, даровавшаго благодать угоднику Своему, разыдошася вси кийждо в домы своя.
Сие пренесение мощей святаго благовернаго великаго князя страстотерпца и чудотворца Андрея Георгиевича Боголюбскаго бяше месяца июлиа в пятый день, торжество же памяти его уставиша праздновати по вся лета месяца июлиа в четвертый день.
Сей святый великий и чудотворивый князь в лета блаженныя и святыя жизни своея созда каменных церквей седмь, прочих же добродетелей всех подробну исчислити невозможно, самодержавствова во Владимире точию осмнадесять лет, и более пребываше в малом своем граде и обители Боголюбове, иже вельми ю любляше, и жительствующих тамо монашествующих и прочиих всякими потребами удовляше, земли и покосы и рыбныя ловли даяше, людей населяше и обитель укрепляше. Во всех же летех богоугодныя жизни своея всякими узорочии церковь святую украшаше и обитель обогащаше и в ней прилежныя своя и теплыя молитвы к Богу и ко Пресвятей Богородице со слезами возсылаше, и прочиими богоугодными делы до блаженныя кончины жизни своея подвизашеся, и страдальческий подвиг соверши. Прославися же от Бога славою вечною на небеси и нетлением и чудотворением на земли, и ныне сей великий угодник Божий о благосостоянии святыя обители сея пред Троичным светом усердне ходатайствует[7]Далее следует комментарий иером. Иосафа: «В заключение
составитель жития говорит: “Писанное подробну сего
святаго и великаго князя житие его и многия по ряду
чудеса грех ради наших, в нашествие, по блаженной
кончине его, ордынских царей от злодейственных татарских
рук огнем потребишася. Сие же от многих малое, из
многих историй собранное вкратце, любви вашей предложися”»..
\\\\\\\—–источник
Список литературы
- РГИА. Ф. 834 (Собр. Синода). Оп. 2. Д. 1788. Л. 61 об. – 81. Большую помощь в подготовке текста Жития к изданию оказала Т.П. Тимофеева, за что приношу ей искреннюю благодарность.
- О сем говорится в Ч[етьих] Мин[еях], см[отри] под чис[лом] 18 окт[ября] (Прим. иером. Иоасафа).
- В рукописи «ноизденством». Исправлено по смыслу.
- По летописи вел[икий] кн[язь] Георгий Владимировичь скончался 1157 г. мая 15 д[ня]. Собр[ание] рус[ских] лет[описей]. [Т.] I, [С.] 149. (Прим. иером. Иоасафа).
- В 9-ти верстах от Владимира. (Прим. иером. Иоасафа).
- Здесь возило, а в Степ[енной] кн[иге] сказано: «и чудную икону на сани поставляху» [Т.] 1. [С.] 298. (Прим. иером. Иоасафа).
- Далее следует комментарий иером. Иосафа: «В заключение составитель жития говорит: “Писанное подробну сего святаго и великаго князя житие его и многия по ряду чудеса грех ради наших, в нашествие, по блаженной кончине его, ордынских царей от злодейственных татарских рук огнем потребишася. Сие же от многих малое, из многих историй собранное вкратце, любви вашей предложися”».
Загрузка...
