Миссия Информарус
14 мин

Источник — ПСРЛ (1950). Т. 3. С. 31-34

Въ лето 6669. (1161) Уладися Ростислав съ Андреемь о Новъгороде, и выведоста Мьстислава, Гюргевъ вънукъ, седевъшю ему годъ до года без неделе, а Святослава въведоша опять на всей воли его, септября въ 28. Тогда же отяшя посадницьство у Нежате, а Захарии даша.

Томь же лете стоя все лето ведромь и пригоре все жито, а на осень уби всю ярь морозъ. Еще же, за грехы наша, не то зло оставися, нъ пакы на зиму ста вся зима тепломь и дожгемь, и громъ бысть; и купляхомъ кадку малую по 7 кунъ. О, велика скорбь бяше въ людехъ и нужда.

Въ лето 6670. (1162) Преставися игуменъ Олькса святыя Богородиця, и поставиша по немь игуменомь Мануила.

Томь же лете у святого Духа Сошьствия поставиша игуменомь Саву.

Въ лето 6671. (1163) Преставися епископъ новъгородьскыи Аркадии септября въ 19; положиша и съ честью великою въ притворе святыя София. ||

Въ лето 6672. (1164) Придоша Свье подъ Ладугу, и пожьгоша ладожане3 хоромы своя, а сами затворишася въ граде съ посадникомь съ Нежатою, а по князя послаша и по новгородце. Они же приступиша подъ городъ въ суботу и не успеша ничтоже к граду, нъ болшю рану въсприяшя; и отступиша въ реку Воронаи. Пятый же день приспе князь Святослав съ новгородьци и съ посадникомь Захариею, и наворопиша на ня, месяця майя въ 28, на святого Еладия, въ четвьрток, въ час 5 дни; и победиша я божиею помощью, овы исекоша, а иныя изимаша: пришли бо бяху въ полушестадьсятъ шнекъ, изьмаша 43 шнекъ; || а мало ихъ убежаша и ти езвьни.

Въ лето 6673. (1165) Поставленъ бысть Илия архиепископъ новъгородьскыи от митрополита Иоанна, при князи Русьстемь Ростиславе, месяця марта въ 28, на вьрьбницю, и приде Новугороду месяця майя въ 11, при князи Новгородьстемь Святославе, а при посаднице Захарии.

Томь же лете поставиша церковь святыя Троиця7 шетициници, а другую на Городищи святого Николы князь Святослав.

Въ то же лето ходи игуменъ Дионисии съ любовью въ Русь, и поведено бысть владыце архиепископьство митрополитомь.

Той же зиме бяше сильнъ морозъ.

Въ лето 6674. (1166) Преставися митрополить Иоанн Кыеве.

Томь же лете заложена бысть церкы камяна святого Спаса на воротехъ въ манастыри святого Георгия.

Въ то же лето, на зиму приде Ростиславъ ис Кыева на Лукы, и позва новгородьце на порядъ: огнищане, гридь, купьце вячьшее; и ту ся разболе самъ, и воротися опять, и преставися на пути; и везоша и Киеву, и положиша и о святого Федора.

Въ лето 6675. (1167) Седе Мьстислав Изяславиць Кыеве на столе.

На ту же весну заложи Съдко Сытиниць церковь камяну святую мученику Бориса и Глеба, при князи Святославе Ростиславици, при архиепископе Илии.

Въ то же лето приде Костянтинъ митрополить въ Русь.

Въ то же лето выиде князь Святославъ из Новагорода на Лукы, и приела въ Новъгородъ, яко «не хоцю у васъ княжити». Новгородьци же целовавъше святую Богородицю, яко «не хоцемъ его», идоша прогнатъ его съ Лукъ. Онъ же услышавъ, оже идуть на нь, иде Торопьцю, а новгородьци послаша въ Русь къ Мьстиславу по сынъ. Святославъ же иде на Волгу, и въда ему Анъдреи помоць, и пожьже Новый торгъ, а новотържьци отступиша къ Новугороду; и много пакости творяше домомъ ихъ, и села ихъ потрати. А брат его Романъ и Мьстиславъ пожьгоста Лукы; а луцяне устерегосшася и отступиша они въ городъ, а ини Пльскову. И съложишася на Новъгородъ Андреи съ смолняны и съ полоцяны, и пути заяша, и селы изьмаша новгородьскыя вьсьде, вести не дадуце Кыеву къ Мьстиславу; а Святослава силою местяце въ городъ, а то слово рекуще:

«нету вамъ князя иного, разве Святослава».

Новгородьци же того не бережаху и убиша Захарию посадника и Неревина и Несду бириця, яко творяхуть е переветъ дрожаще къ Святославу. И налезоша собе путь на Вяцька и на Володяря; и иде Даньславъ Лазутиниць съ дружиною Кыеву къ Мьстиславу по сынъ; а Святославъ приде съ суждалци и съ братома и съ смолняны и съ полоцаны къ Русе; идоша новъгородьци съ Якуномь противу ихъ, они же, не дошедъше, воротишася: не успеша бо ничтоже.

Тогда же даша посадницьство Яку-нови; и седеша новъгородци бес князя от Сменя дни до велика дни о Якуне, жьдуче от Мьстислава сына. На ту же Зиму ходи Мьстислав на Половьце, и победи е, и приведе полонъ въ Русьску землю толь сильно, яко и числа не бяше.

Въ то же лето преставися раба божия Анна, игумения святыя Варвара; и поставиша на месте ея Марьмьяну.

Въ лето 6676. (1168) Приде князь Романъ Мьстиславиць, вънукъ Изяславль, Новугороду на столъ, месяця априля въ 14, въ въторую неделю по велице дни, индикта пьрваго; и ради быша новгородьци своему хотению.

Въ то же лето ходиша новгородьци съ пльсковици къ Полотьску и пожьгъше волость, воротишася от города за 30 вьрстъ.

Тому же лету исходящю, на весну ходи Романъ съ новгородьци къ Торопьцю, и пожьгоша домы ихъ, и головъ множьство полониша.

Въ то же время ходиша Ростиславици съ Андреевицьмь и съ смолняны и съ полочяны и съ муромьци и съ рязаньци на Мьстислава Кыеву; онъ же не бияся с ними, отступи волею Киева.

Въ лето 6677. (1169) Иде Даньслав Лазутиниць за Волокъ даньникомь съ дружиною; и присла Андреи полкъ свои на него, и бишася с ними, и бише новгородьцев 400, а суждальцев 7000; и пособи богъ новгородцемъ, и паде ихъ 300 и 1000, а новгородьць 15 муж; и отступиша новгородьци, и опять воротивъшеся, възяшя всю дань, а на суждальскыхъ смьрдехъ другую, и придоша сторови вси.

Въ то же лето, на зиму, придоша подъ Новъгородъ суждальци съ Андреевицемь, Романъ и Мьстислав съ смольняны и съ торопьцяны, муромьци и рязаньци съ двема князьма, полоцьскыи князь съ полоцяны, и вся земля просто Русьская. Новгородьци же сташа твьрдо о князи Романе о Мьстиславлици, о Изяславли вънуце, и о посаднице о Якуне, и устроиша острогъ около города. И приступиша къ граду въ неделю на съборъ, и съездишася по 3 дни въ четвьртыи же день въ среду приступиша силою и бишася всь день и къ вечеру победи я князь Романъ съ новгородьци, силою крестьною и святою богородицею и молитвами благовЬрнаго владыки Илие, месяця феураря въ 25, на святого епископа Тарасия, овы исекоша, а другыя измаша, а прокъ ихъ зле отбегоша, и купляху суждальць по 2 ногате.

Въ лето 6678. (1170) Бысть дорогъвь Новегороде: и купляху кадь ръжи по 4 гривий, а хлебъ по 2 ногатЪ, а медъ по 10 кунъ пудъ. И съдумавъше новъгородьци показаша путь князю Роману, а сами послаша къ Ондрееви по миръ на всеи воли своей.

Въ то же лето въниде князь Рюрикъ Ростиславиць въ Новъгородъ, месяця октябра въ 4, на святого Иерофея.

Въ то же лето архелископъ боголюбивыи Илия съ братомь Гавриломь създаста манастырь, церковь святыя Богородиця Благовещение.

Томь же лете преставися князь Мьстиславъ Изяславиць, Володимирь вънукъ.

Въ то же лето преставися князь Кыеве Глебъ Гюргевиць; и въведоша Володимира Мьстиславиця.

Въ лето 6679. (1171) Преставися князь Кыеве Володимиръ, седевъ на столе 3 месяце.

Томь же лете отъя князь Рюрикъ посадницьство у Жирослава Новегороде, и выгна и из города, иде Суждалю къ Ондрееви; и даша посадницьство Иванку Захарииницю.

Въ то же лето седе на столе Киеве Романъ Ростиславиць.

Томь же лете иде, на зиму, Рюрикъ из Новагорода, и послаша новъгородьци къ Ондрею по князь; и присла Жирослава посадницитъ съ мужи своими.

Въ лето 6680. (1172) Приде Новугороду князь Гюрги Андреевиць, Гюргевъ вънукъ.

Въ то же лето заложиша церковь камяну святого Якова въ Неревьскемь коньци.

Томь же лете выиде Романъ ис Киева Ростиславиць волею, и седе Михалко Гюргевиць Кыеве.

Томь же лете, на зиму, ходи арьхиепископъ новгородьскыи Илия къ Ондрееви, Володимирю, на вьсю правьду. Тъгда же и даша опять посадницьство Иванъкови Захарииницю.

Въ лето 6681. (1173) Иде князь Гюрги Андреевиць съ новгородьци и съ ростовици Киеву на Ростиславице и прогнаша е ис Киева, и стояше подъ Вышегородомь 7 недель, и придоша сторови вси Новугороду; а Ярославъ седе Киеве Изяславиць.

Томь же лете святи церковь Новегороде Илия архиепископъ новгородьскии, святую мученику Бориса и Глеба, камяную, въ граде, месяця октября в 14, а другую святого Спаса на воротехъ святого Георгия, камяну.

Въ лето 6682. (1174) Убиша Володимири князя Андрея свои милостьници: на канонъ святою Петру и Павлу, в нощь, спящю ему въ Боголюбьмь, и бяше с нимь одинъ кощеи малъ; избивъше стороже двьрьния, придоша къ сеньмъ, князю же очютивъше, попадъ мечь и ста у двьрин, боряся с ними, оныхъ же бяше много, а князь одинъ; яко налегоша силою и виломиша двьри и вълезоша на нь, и ту и насунуша рогатинами, и ту сконьця животъ свои. И великъ мятежь бысть въ земли той и велика беда, и множьство паде головъ, яко и числа нету; и потом посадиша на столе Мьстислава Ростиславиця съ братомь Ярополкомь.

Томь же лете седе Киеве Романъ Ростиславиць, вънукъ Мьстиславль.

Раздел «Андрей Боголюбский»

Оцени статью - помоги проекту:
(Пока оценок нет)
Загрузка...

Опубликовано: 30.01.2021
Изменено: 30.01.2021

Чесноков Константин Иванович
Биограф, историк, публицист
Добрый день! Интересуюсь историей ещё со школы и убеждён, что изучение биографий выдающихся личностей не только обогащает знаниями, но и помогает лучше прочувствовать дух разных эпох.

Помните совет Ломоносова: "Народ, не знающий своего прошлого, не имеет будущего"
P.S. Найти наши статьи в Google и Яндекс легко - просто набери в конце запроса "информарус", например:
"внешняя политика княгини Ольги информарус"